EULOGY to my DAD

Kalay i patey, to li kaikdag i hawang
To kaomaha lay timpon nalabah
Nem to katekwa lay masakbayan,
Hiyayan kan da ay biyag, ni tayo panyahyahyahan
Hina-dom waday gaya, nem wa-wa-day ligat tan panlinggayohan
No pampilli dakiho, hapa piyan tayon manta-olid yan biyag mowan?
Halamat et ngo ay tokiho hindak ni Nallagan hi-gatayo
Isunga anggan kindaw To lay biyag ni anhemek tayo
Amta tayo ngo dadan ay ag mahammah Apo Diyoh
Hota annan palano To, hiyaman i kustokusto.
Panggep ni degeh ni kamalekna panggep ni naandi lad ya
Amon dakel i kamaibbagga ni kan ta ay kalay anhan dama
To anhan la binigla, nakol igyan ma-noy agyat ni wada
Kan ta kayman ngo ay mabaybayag od pay na-mo
Nem hipay pahding tayo, makakonhi-gan biyag
Kan to ay inggato law diyan aboh.

Halamat ngo dadan Apo, ni timpon indawat mo
Kaanohan ni ama, hi-gami nangiptekan mo,
Dakel ni sakripisyo noman i impatibew to
Kuston ogali tan pahding ni pambiyag, hiyaman i impatawid to.
No waday nebbeng ko ni mangi-ittak ni hakey too
Andi adom nem hi amak, hi-gatoy i-itak ko
Nambalibalinan ko, gabol ni kaanoh to.

Aliwan hi-gato hota toon manghel ni kan toy hiyayay ammagen yo,
Nem apil ngo lay ammagen to
Andi kan to ay ag yo onoden i amag ko
Ta amag ni impaboya to, gandat ni bagay ton maonnodan ngo.

Wada nontan la limaw kamid Cagayan
Kan ko noman ay diman i nak pan-ihkoylaan
In-ilaw towak noman, naogip kamid pehed ni ogippan
Intolod towak di ihkoylaan at diman i nak nantesan
Nem nonta on-akad kami, aboh kon to nallogan
Ni kan to ay basta mapanglo-ak di mi akkadan
Hapa ngo gayam ay andi law i pilak ton to ibbayad di palloganan
Isunga nakilogalogan di linggaman,
nailognan ni balat ay nowang,
nan-apah ay nandalan inggaton to dintengan.

Dakel i maistorya ni panggep ni hi ama mi ayya
Nem no waday iddayaw kon kan koy pehed ni impahding to
Hay to kaeh-elan nayon, kan toy ‘Kaahin Apo Diyoh’
Andi nak nangngelan ni to in-itak i pehed ni immag to.
No waday palanoen to, to kaipiyal ni hi Apo Diyoh
Anggan ni o-oni pangmagan to, kan toy ‘No ipaloboh ni Apo’
Pamadti ton Apo Diyoh, gandat noman ni napkel ngo
Isunga Halamat ni hi Apo Diyoh ta anggan tallompolo tan tallon taw-en ni aboh
Intolok to ngo dadan ni nak binoyboyay pehed ni nambiyag tatang ko
At halamat ngo no anggan kagodowan aboh
Kayyaen kon onnoden i impahding ton nangibilang ni gait ton too
Tan nanmek to ni hi Apo Diyoh.

Halamat ni in-inhel yo, hi-gayon ginaigait to
Naliwliwa kami ngod rispiton impatibew yo
Mangittolloy ni pangi-ang-angan tayon pamadti tayo
Hi Apo Jesus i pangittangngayan tayo
Ta aboh ton andi kolang to
At pangayyowan ton pamadti tayo
Gandat ni pandinnelan tayo
Tep hi-gatoy napanglon nanmek ni hi-gatayo.

Isunga Apo Diyoh, ehel mo lan tatang ko
Ay di amin alin timpo ni pangillahhatan kon biyag ko
Andin gandat i palliwwanen ko anggan hipan intibew ko
Pehed ni impahpahding to, hi-gato ngoy pahding ko
Anggan bilang ay amtak ay gandat ni way pangkolangan ko.
Ehel mo pay ni hi-gato ay ikkadik nihayan ngihmo
Ayowanan mih nanang mi, hi-gamin amin ni onga to
Andi to pandannagan ta panggep ni tolong mo, Apo
Ipeppetek min manhilbi ni ingah toy nanhilbi to
Hiyay mai-annam kami anhan ni maawwagan ay poli to.

Kadaw ko atman ayyan Apo Diyoh
Kaahhim ali patibbew mo
Ta nihayan akaandi to
Kamantaotaoli nemnem ko
Ni dakel i baga to
Nem ingah toy kan ni hi nanang ko
Andi angkay kahammaan mo
Isunga iddinel ko
Hota andi kolang ton ayyowan mo
Nama-man haya ni hay nemnem ko
Ni hina-dom ay himmalip i naitlo.
Hi-gam i nadayaw Apo
Hi-gam i Andi Palpeg To
Hi-gam i Andi Kolang To
Hi-gam i Andi Kaingah To
Nem hinmek mokami dadan ngo
Isunga andi mah-el nem ag Halamat ni Hi-gam, Apo Diyoh!